Bil milli bíla

Ég hef heyrt menn tala mikið um það hversu hraðakstur er hættulegur og nýlega hefur verið komið aftan að þorra landsmanna með því að hringla með vikmörk og þannig lækka þann hraða sem hefur verið leyfilegur um áraraðir og almennt samþykktur sem í lagi. 

En hvernig væri nú að siðapostularnir færu að ræða við ökumenn um að hafa bilið í næsta bíl það mikið að hægt sé með góðu móti að fara fram úr.  Þeir sem vilja keyra á 80 eru svo sannarlega í fullum rétti til þess það er alveg staðreynd en þegar það eru búnir að klessa sér saman 2 húsbílar og jafnmargir jeppar með eftirvagna sem eru svo samgrónir að flugurnar eiga erfitt með að komast á milli verður nær ómögulegt að taka fram úr einum þeirra án þess að taka fram úr þeim öllum. 

Þegar framúrakstur á sér stað er hann almennt öruggastur þegar hann gengur hratt fyrir sig.  Menn hér á Íslandi virðast eiga í einhverjum erfiðleikum með að skilja þetta og hef ég tekið eftir því að þegar ég flauta til að gefa til kynna að nú ætli ég að taka fram úr viðkomandi er gert annað af tvennu, gefið er í eða ekki neitt.  Það er ekki gerð nein minnsta viðleitni til að liðka fyrir því að ég komist fram úr.

Þegar ég ræði umferðina á Íslandi við þá sem hafa ekið erlendis eru menn sammála um að hér skortir á tillit.  Þegar ég ræði við Íslendinga þá eru þeir analega sammála um að það vanti tillit en hvar eru þessir tillitslausu amk hef ég heyrt lítið um þá.  Við erum orðin svo tillitslaus að samborgarar okkar vilja síður liðka fyrir að menn komist inn í umferðina því við erum orðin svo allvön því að okkur sé nær ekkert tillit sýnt.

Athugasemdir

[Sveinn Ingi Lýðsson, 12.8.2007 kl. 21:40]

Góð ábending hjá þér Indriði.   Til er mjög einföld regla sem allir ökunemar læra varðandi bil á milli bíla.  Þessi regla er kölluð "þriggja sekúnda reglan".  Í henni felst að þegar bíllinn á undan þér fer framhjá einhverju kennileiti, s.s. vegstiku, umferðarmerki e.þ.h. eiga að líða a.m.k. þrjár sekúndur þar til þinn bíll kemur að þessu sama kennileiti.  Þetta má auðveldlega mæla án þess að nota skeiðklukku með því að telja:  eittþúsundogeinn, eittþúsundogtveir, eittþúsundogþrír.  Nokkurn veginn 3 sek.

Á 90 km/klst fer bíllinn u.þ.b. 27 m/sek.  Viðbragð hjá vönum ökumanni getur verið allt að 1 sek. þar til stigið er á bremsu.  Ef ökumenn færu almennt eftir þessu mætti fækka algengustu tryggingatjónunum sem eru aftanákeyrslur.  Þar með spara verulega í iðgjöldum.  Nógu eru þau há.